لو ما كنت سوداني...

لوما كنت سودانـــــــــي:

كنت ح تلتزم بالمواعيد

كنت ح تدفع فاتورة المحامي او الطبيب قريبك

كنت قاضيت المهندس اللي خرب ليك بيتك

كنت عملت مشروعك بنفسك دون محاكاة

كنت بدأت دوامك في الموعد المحدد

كنت حتنطق حرف ال (ق ) و ال (غ) كما ينبغي وما كنت حا تقول للتسعة تزعة

كنت بطلت تسف ساعوط

كنت صرت متخصص وعالم في مجالك

كنت حتلبس شيك جدا عند خروجك أمام التلفاز وأجهزة الاعلام

كنت تتحدث بطلاقة وإنسيابية بدون أ أ أ أ أ أ

لوما كنت سودانـــــــــي:

كنت عرفت ان بالدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا

وكنت خططت لحياتك ومستقبلك و كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالزات يعنى اخنق فطس..

كنت ح تتصل بالتلفون قبل زيارة أحد في منزله بدري شويه, مش و أنت في خشم الباب ده طبعا لو اتصلت وما جيت داخل زي قدر الله بدون حتي ماتدق الباب وتدقو ليه؟؟مش في سلك تجرو وتدخل!!بدون مراعاة لحرمة البيت

ولوما كنت سودانـــــــــي:

كنت انتظرت دورك في الصف وخلصت معاملتك بنظام بدل الململة البتعملوها

وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لناس البيت الضغط والسكري....

كنت حا تتوقع بحصل شنو لما ترقد طفلك الصغير بدون بامبرز في سرير في بيتناس!!

ولوما كنت سودانـــــــــي:

كنت ح تخلي الصغار في البيت عندما تكون المناسبة مناسبة كبار..-

كنت اتونست بصوت معقول, خصوصا' عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر ساكت...

كنت امتنعت عن التدخين في منزل شخص اخر, او على الاقل استأذنت قبل ما تولع...

كنت ترددت في ارسال حاجات وزنها خمسة كيلو و ما فوق مع كل من تسمع بأنه ماشي السودان...

كنت رجعت القروش الاستلفتها في وقتها, أو في الحقيقة رجعتها و بس..

كنت امتنعت عن زيارة احدهم في مكتبه , للونسه او مناقشة امور لا صله لها بالعمل

كنت خجلت من عدد المسكولات التي تعملها, مش كمان تقول 'شنو يا فردة, خمسه مسكولات ما ترد عليها؟ و الله الفيك اتعرفت..؟!!!

كنت حا تقعد فى صالون الناس بدل تلوص فى البيت كلو..

كنت حا تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك( لو كان فى يعنى) ..

كنت ما حا تمشي مستشفى الولادة وتقعد تحقن النسوان الفى العنبر كلهم (واللللللللللله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج ..اصلا انتو البوديكم شنو مستشفي الولادة)؟؟ عشان تودو نسوانكم اوكي آمنا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام استنو لمن تطلع في البيت أما لو كانت اختك او زوجة اخوك يا ريت الزيارة تكون من طرف الاوضة وتتوكل علي الله ...

ولوما كنت سودانـــــــــي:

ما كان كل يوم جاييك تلفون رسل وجيب وحول عشان هم يقعدوا ياكلو فى حقك لا شغل لا مشغلة ويشتغلو ليه؟؟كفاية عندهم سودانى مغفل زيهم يرسل بدون تفكير ..

ولو ما كنت سودانى مستحيييييييييييييييل تدى اخوك يبنى ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين ويقوليك أكلتها وكمان يزعل منك ويخاصمك ويعملها حكاية طويلة وعريضة

ولو ما كانو اهلك زااااتهم سودانييين ما كان غلطوك وطلعوك انت الكعب!!وجبروك تسكت عن حقك وطلعت من الموضوع بي ازمة نفسية!!

صدقنى لو ما كنت سودانى كانت حياتك مشت بى اريحية ونظام ورااااااااحة كانت مجاملاتك حا تكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!..

كنت نمت لما تحب وتصحى لمن تحب..كنت انت القررت مشروع زواجك بمن تحب بدل القبيلة كلها تقرر معاك..ويجزمو بأغلظ الإيمان انو فلانة هي البتناسبك !!!عرفو احتياجاتك كيف؟؟ميولك كيف؟؟طلبك كيف؟؟ انا ما عارف!!!!!.حتى لوكان إختيارك برضوا ما بريحوكم تبدأ الحرب بينم وبين نسابتك وإنتوا في النص....

كنت سميت اولادك الاسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الام ابسط الحقوق انها تسمي الكائن الكانت شايلاو تسعة شهور وتعبانة فيهو ده!!!

.كنت استمتعت باجازتك وبى وقتك وحياتك بدل كل واحد يديك الفتوى الفى دماغو..لو ما كنت سودانى كنت حا تكون سييييييييييد نفسك وووووووووووووووووووووووووووووووووووووو.

تخيل كيف يكون الحال لو ماكنت سوداني وأهل الحارة ماأهلي

صحيح عندنا كتير من السلبيات لك مع مرور الزمن ممكن تتعالج وفي النهاية بنكون سودانيين

تسلم علي الطرح

لو ماكنت سوداني حترتاح من هموم كتييييييييييييره وتتبعب من حاجاااااااااات كتيره
ولا خيرة الا فيما اختاره الله
الحمد لله انو انا سوداني
علي الاقل في زول بزروك
لما تمرض وبقيف معاك لابعد الحدود حتي لو عمل ليك وجع وش
ولما يكون عندك فرح بتلقي الف مين يقيق جنبك ويسدها معاك
ولما يكون عندي ترح بتقلي آلاااااااااااف البواسوك ويقيفو جنبك
وحتي لو قعدو بعد الاربعين اربعين يوم
فالحق لكي سوداني ان يفتخر بانه سوداني
وانا افتخر بانني سوداني رغم العيوب الفي ؟؟؟

الحمد لله نفتخر بي سودايتنا...
لكين ما عيب أنو نعترف بعيوبنا كسودانيين.. العيب أننا ما نعترف بيها و نتمادى فيها